Sut i ymgeisio
Ymgeisio ar-lein Parhau cais ar-lein
Rydym ni yma i gefnogi cymunedau gyda’r pethau sy’n bwysig iddyn nhw, gan gynnwys effaith yr argyfwng costau byw.
Gallwch ymgeisio am gyllid i gynnal gweithgaredd newydd neu gyfredol, neu i gefnogi eich sefydliad i newid ac addasu i heriau newydd a’r dyfodol.
Gallwn ariannu prosiectau a fydd yn gwneud o leiaf un o’r pethau hyn:
- dod â phobl ynghyd er mwyn meithrin perthnasoedd cryf mewn cymunedau ac ar eu traws
- gwella’r llefydd a’r mannau sy’n bwysig i gymunedau
- helpu mwy o bobl i gyrraedd eu potensial, trwy eu cefnogi yn ystod y cam cynharaf posibl.
- cefnogi pobl, cymunedau a sefydliadau sy’n wynebu gofynion a heriau cynyddol o ganlyniad i’r argyfwng costau byw.
Ymgeisiwch 12 wythnos cyn y mae angen yr arian arnoch
Byddwn ni’n rhoi ein penderfyniad i chi cyn gynted ag y gallwn ni. Mae hyn fel arfer yn cymryd tua 12 wythnos.
Os ydych chi’n llwyddiannus, mae hi fel arfer yn cymryd pythefnos i dalu’r arian i chi.
Dim ond un grant Arian i Bawb y gallwch ei gael ar y tro
Dim ond un grant ar gyfer pob gwlad wahanol yn y DU y gallwch ei gael ar y tro.
Os hoffech chi ymgeisio am grant newydd – bydd angen i chi aros tan bod eich grant diwethaf gyda ni wedi dod i ben. Ni fyddwch chi’n gymwys os ydych chi wedi anfon cais am grant Arian i Bawb y Loteri Genedlaethol yn barod ac yn aros am benderfyniad.
Os hoffech chi ymgeisio eto am ragor o arian, dim ond uchafswm o £20,000 y gallwn ei ddyfarnu i’ch sefydliad o fewn cyfnod o 12 mis.
Dim ond swm penodol o gyllid sydd gennym i’w ddyfarnu
Rydym ni’n derbyn llawer o geisiadau, ac mae nifer ohonynt ar gyfer prosiectau gwerthchweil iawn. Mae hyn yn golygu bod angen i ni wneud penderfyniadau anodd ynghylch pa brosiectau y gallwn eu hariannu, wrth ddarllen yr holl geisiadau yr ydym wedi’u derbyn. Felly yn aml, mae llawer o brosiectau na allwn eu hariannu, hyd yn oed y rhai da.
Os yw’n anodd neu’n amhosibl i chi gwblhau ffurflen gais
Gallwch gysylltu â ni os oes gennych unrhyw anghenion cyfathrebu. Rydym yn hapus i siarad am ffyrdd amgen i chi ddweud wrthym am eich syniad.
Pa wybodaeth sydd ei hangen arnoch i ymgeisio
Gallwch weld rhestr lawn o gwestiynau o’r ffurflen gais.
Rydym yn gofyn am y manylion cyswllt, cyfeiriadau cartref a dyddiadau geni dau berson gwahanol o’ch sefydliad. Mae angen gwahanol gyfeiriadau e-bost ar y ddau gyswllt.
Dylai un person fod yn rhywun gallwn siarad â nhw os oes gennym unrhyw gwestiynau am eich prosiect. Dylai’r llall fod yn uwch aelod o’ch sefydliad. Mae’r ddau angen byw yn y Deyrnas Unedig.
Ni all y ddau berson fod yn perthyn i’w gilydd. Gall hyn olygu:
- yn perthyn trwy briodas
- mewn partneriaeth sifil â’i gilydd
- mewn perthynas hirdymor gyda’i gilydd
- yn perthyn trwy bartner hirdymor
- yn byw gyda’i gilydd yn yr un cyfeiriad
- yn perthyn trwy waed.
Rydym yn gofyn i chi am enw cyfreithiol, cyfeiriad a math eich sefydliad.
Gwiriwch y manylion hyn cyn ymgeisio, ynghyd ag unrhyw rifau cofrestru os oes gennych chi nhw – fel rhif elusen neu rif cwmni. Bydd hyn yn oedi eich cais os nad yw’r manylion yn gywir.
Rydym yn gofyn am wybodaeth am gyfrifon eich sefydliad
Rydym eisiau gwybod y dyddiad rydych yn gorffen eich cyfrifon bob blwyddyn a faint o incwm sydd gennych.
Os nad oes gennych gyfrifon blynyddol gan eich bod yn sefydliad newydd (iau na 15 mis oed), mae hynny’n iawn. Gallwn dal edrych ar eich cais.
Rydym yn gofyn i chi am wybodaeth am y math o brosiect yr hoffech ei wneud
A sut bydd eich prosiect yn helpu ac yn cynnwys eich cymuned.
Rydym hefyd yn gofyn i chi ddarllen a chytuno i’n telerau ac amodau
Gallwch gymryd golwg ar ein telerau ac amodau.
Os nad ydych yn siŵr am y math o bethau rydym yn ei ofyn pan fyddwch yn ymgeisio
Anfonwch eich cyfriflen banc atom
Yr hyn sydd ei angen arnom
Gofynnwn am un cyfriflen banc wedi’i ddyddio yn ystod y tri mis diwethaf er mwyn i ni allu gwirio'r cyfrif rydych am i ni dalu'r grant iddo.
Ni fyddwn yn gallu asesu eich cais os nad oes gennych gyfrif banc a datganiad banc sy'n bodloni ein gofynion isod a bydd angen i chi ailymgeisio ar ôl i chi sefydlu'r rhain. Os nad ydych yn siŵr, cysylltwch â ni.
Mae angen y canlynol arnom:
- Cyfrif banc sy'n bodloni ein hanghenion yn ein Canllawiau Rheolaethau Ariannol a Llywodraethu Ariannol
- Cyfriflen banc sy’n bodloni ein hanghenion - fel y llun hwn o'r math o gyfriflen banc rydym ni'n chwilio amdano.
Ein hanghenion Cyfrif Banc
Dylai ddangos:
- logo’r banc
- enw cyfreithiol eich sefydliad
- y cyfeiriad yr anfonir y datganiadau ato
- enw’r banc
- rhif y cyfrif
- cod didoli
- y dyddiad y cyhoeddwyd y llythyr/cyfriflen
Dyma lun o’r math o gyfriflen banc rydyn ni’n chwilio amdano.
Beth sy’n digwydd ar ôl i chi ymgeisio
- Rydych yn anfon eich cais – Byddwn yn cysylltu â chi gyda phenderfyniad ymhen tua 12 wythnos. Yn ystod y 12 wythnos hyn rydym yn edrych ar eich syniad ac yn gwneud ein gwiriadau diogelwch. Gallwch ddarganfod mwy am y gwiriadau a wnawn. Efallai byddwn yn eich ffonio o fewn y 12 wythnos i drafod ychydig mwy am eich syniad, neu i ofyn am fwy o wybodaeth.
- Os yw eich cais yn llwyddiannus – Byddwn yn anfon e-bost atoch gyda’r newyddion da! Gallwch ddechrau’r prosiect cyn gynted ag yr ydych yn derbyn yr e-bost hwn. A byddwn yn rhoi’r arian yn eich cyfrif banc o fewn 14 diwrnod (neu’n gynt, os yn bosibl).
- Gallwch ddechrau gwario’r arian ar eich prosiect – Dylech wario’r arian fel y dywedoch y byddech yn eich cais (oni bai ein bod wedi cytuno i rywbeth gwahanol yn gyntaf). Efallai byddwn yn gwirio’r prosiect o bryd i’w gilydd i weld sut mae popeth yn mynd. Dysgwch ragor am reoli eich arian.
- Rhannu eich stori – Gallwch ddweud wrth eich cymuned leol, rhannu eich newyddion da ar y cyfryngau cymdeithasol neu gysylltu â phapurau newydd lleol. Dyma wybodaeth am sut i hyrwyddo eich prosiect. Byddwn yn gwneud cyhoeddiad i’r wasg ac yn rhannu eich stori hefyd. I ddangos eich bod wedi derbyn cyllid, gallwch hefyd lawrlwytho a defnyddio logo Cronfa Gymunedol y Loteri Genedlaethol yn Gymraeg a Saesneg.
Lleihau eich ôl-troed amgylcheddol
Mae ein hamgylchedd yn bwysig i Gronfa Gymunedol y Loteri Genedlaethol ac rydym bob amser yn ceisio rheoli ein heffaith amgylcheddol. Rydym ni’n annog ac yn cefnogi prosiectau a chymunedau i wneud yr un peth. Dysgwch ragor am sut allwch chi wneud eich prosiect neu ddigwyddiad yn fwy amgylcheddol gynaliadwy ac efallai arbed arian ar yr un pryd yn ein canllawiau ar leihau eich ôl-troed amgylcheddol.
Fideo Iaith Arwyddion Prydain (BSL) – sut i ymgeisio
Gwyliwch cyfieithiad BSL o sut i ymgeisio i Arian i Bawb y Loteri Genedlaethol Cymru (YouTube):