Rhyddid Gwybodaeth
Mae Deddf Rhyddid Gwybodaeth 2000 yn rhoi'r hawl i aelod o'r cyhoedd gael mynediad at wybodaeth a gedwir gan awdurdodau cyhoeddus. Mae'r holl wybodaeth sydd gennym yn gymwys i'w rhyddhau er y byddwn yn ystyried a oes unrhyw eithriadau yn berthnasol.
Mae rhagor o wybodaeth am Ddeddf Rhyddid Gwybodaeth 2000, gan gynnwys i bwy y mae'r Ddeddf yn berthnasol, pa wybodaeth y gallwch ofyn amdani, sut y gallwch ofyn amdani a sut y bydd eich ceisiadau yn cael eu trin, ar gael ar wefan y Comisiynydd Gwybodaeth.
Mae ceisiadau am wybodaeth sy'n ymwneud â chyflwr yr amgylchedd yn cael eu trin o dan Reoliadau Gwybodaeth Amgylcheddol 2004 (EIR). Bydd unrhyw wybodaeth sy'n dod o dan EIR yn cael ei rhyddhau oni bai bod eithriad yn berthnasol.
I ofyn am wybodaeth o dan y rheoliadau hyn, dylech ddilyn yr un broses ag ar gyfer ceisiadau Rhyddid Gwybodaeth. Mae rhagor o wybodaeth am y rheoliadau Gwybodaeth Amgylcheddol ar gael ar wefan y Comisiynydd Gwybodaeth.
Sut i ofyn am wybodaeth gennym ni
Mae llawer o'r wybodaeth a ddelir gennym eisoes ar gael i chi. Cyn i chi wneud cais swyddogol dylech:
- chwilio ein gwefan am yr wybodaeth
- gwirio cynllun cyhoeddiadau Cronfa Gymunedol y Loteri Genedlaethol.
Os hoffech ofyn am wybodaeth am Gronfa Gymunedol y Loteri Genedlaethol, anfonwch e-bost at: freedomofinformation@tnlcommunityfund.org.uk
Rhaid i'ch cais nodi eich enw llawn ac mae'n ddefnyddiol os gallwch roi cymaint o fanylion â phosibl i ni am y wybodaeth rydych chi'n chwilio amdano. Os nad ydych yn siŵr pa wybodaeth sydd gennym ar bwnc penodol, byddwn yn hapus i gynnig cyngor a chymorth pellach i chi. Byddwn yn cydnabod eich cais a rhaid i ni ymateb yn llawn o fewn 20 diwrnod gwaith.
Os ydych wedi gofyn am wybodaeth sy'n ymwneud â thrydydd parti, efallai y bydd angen i ni ymgynghori â phartïon o'r fath er mwyn dod i farn a ellir rhyddhau'r wybodaeth. Wrth ymgynghori â thrydydd partïon, bydd hunaniaeth y ceisydd yn parhau i fod yn gyfrinachol ac ni chaiff ei ddatgelu.
Ar gyfer cwsmeriaid sydd wedi gwneud cais neu wedi derbyn grant gennym ni
Mae Deddf Rhyddid Gwybodaeth 2000 yn rhoi'r hawl i aelodau o'r cyhoedd ofyn am unrhyw wybodaeth sydd gennym ni. Mae hyn yn cynnwys gwybodaeth a dderbynnir gan drydydd partïon, megis, er nad yw'n gyfyngedig i ymgeiswyr grant, deiliaid grant a chontractwyr.
Os ydych chi'n meddwl bod gwybodaeth yn eich cais a allai fod wedi'i heithrio rhag rhyddhau os gofynnir amdano, dylech roi gwybod i ni pan fyddwch yn gwneud cais. Fel arfer, ni fyddwn yn rhyddhau gwybodaeth am eich prosiect tra ei fod yn y broses asesu. Fel arall, byddwn yn defnyddio ein barn ynghylch a fydd unrhyw eithriadau yn berthnasol i wybodaeth y gofynnwyd amdano, y gallwn ofyn am eich barn arni. Byddai gwybodaeth bersonol yn cael ei chadw yn amodol ar ofynion deddfwriaeth diogelu data.
Er y gallwch gael eich ystyried fel cwsmer, mae gennych yr un hawliau mynediad at wybodaeth ag aelod cyffredinol o'r cyhoedd o hyd.
Y Cynllun Cyhoeddiadau
Mae'r Ddeddf Rhyddid Gwybodaeth yn ei gwneud yn ofynnol i ni gynhyrchu Cynllun Cyhoeddiadau. Trwy 'gyhoeddiadau' rydym yn golygu gwybodaeth sydd ar gael i'r cyhoedd mewn amrywiaeth o fformatau, er enghraifft, adroddiadau ar bapur neu dudalennau gwe.
Mae'r cynllun cyhoeddi yn ddogfen sy'n disgrifio'r wybodaeth rydyn ni'n ei chyhoeddi yn rheolaidd, ble gallwch ddod o hyd iddi, ac a ydym yn codi tâl amdano. Nid yw'n rhestr o'n cyhoeddiadau: mae'n disgrifio'r mathau o wybodaeth rydyn ni'n ei chyhoeddi.
Mae ein cyhoeddiadau ar gael, ar gais, mewn Braille, print bras, tâp sain ac ieithoedd cymunedol.