Neidio i'r prif gynnwys

Croeso i’n gwefan newydd. Efallai y byddwch yn gweld rhai tudalennau o’n hen wefan wrth i ni symud pethau draw.

Pwyllgor Cymru

Mae Pwyllgor Portffolio Cymru yn canolbwyntio ar ariannu yng Nghymru. Ar y pwyllgor mae pobl sy’n deall anghenion eu hardal ac sy’n angerddol am helpu eu cymunedau i ffynnu.

Maen nhw’n gwneud penderfyniadau ar grantiau mawr, yn llywio blaenoriaethau lleol, ac yn sicrhau fod ein hariannu yn cael yr effaith fwyaf bosibl.

Cwrdd â'n Pwyllgor

Dr Simone Lowthe-Thomas - Cadeirydd Pwyllgor

Mae Simone yn arweinydd sydd â gwerthoedd yn ei llywio a sydd dros 25 mlynedd o brofiad o weithio ar groestoriad hinsawdd, natur, gwydnwch cymunedol, ac adfywio sy’n seiliedig ar le. Mae ei gyrfa wedi canolbwyntio ar bontio canlyniadau amgylcheddol a chymdeithasol—mynd i'r afael â thlodi, cefnogi economïau lleol cynhwysol, a helpu pobl, natur a lleoedd i ffynnu.

Fel Prif Weithredwr Asiantaeth Ynni Hafren Gwy, arweiniodd ar y gwaith o gyflwyno rhaglenni a oedd yn cynnwys cynhesrwydd fforddiadwy, ynni carbon isel, ac adfywio cymunedol yn rhai o ardaloedd mwyaf difreintiedig Cymru a Lloegr . Mae uchafbwyntiau ei gwaith yn cynnwys creu canolfannau lles sy'n seiliedig ar le, arloesi modelau ynni-ar-bresgripsiwn, a datblygu mentrau cymunedol a mentrau sy'n seiliedig ar le arloesol fel Cynefin, Creu Eich Lle a Dyfodol Gwledig .

Ar hyn o bryd, mae hi'n gwasanaethu fel Cyfarwyddwr Adfer Natur a Newid Hinsawdd ym Mharc Cenedlaethol Bannau Brycheiniog, lle mae hi wedi chwarae rhan allweddol yn ail-lunio strategaeth, brand a diwylliant y sefydliad o amgylch lles, tegwch a chyflawni dan arweiniad nodau, er mwyn mynd i'r afael â'r argyfyngau Natur a Hinsawdd.

Drwy gydol ei gyrfa, bu ganddi ymrwymiad cryf i werth cyhoeddus a phartneriaeth. Roedd hi'n Gyfarwyddwr sefydlol Ynni Cymunedol Cymru, a gwasanaethodd fel Is-lywydd Ynni Cymunedol yn Fedarené — y ffederasiwn Ewropeaidd ar gyfer asiantaethau ynni rhanbarthol.

Mae Simone yn Aelod o Fwrdd y DU ac yn Gadeirydd Pwyllgor Ariannu Cymru yng Nghronfa Gymunedol y Loteri Genedlaethol. Mae hi hefyd ar Bwyllgor Ariannu'r DU, yn is-gadeirydd panel y Gronfa Gweithredu Hinsawdd ac yn aelod o'r Pwyllgor Archwilio a Risg. Mae Simone wedi chwarae rhan frwd yn ein gwaith Strategaeth, gyda ffocws penodol ar ein Nodau Amgylcheddol a hefyd ein rhaglen Llais Ieuenctid, gan gynnwys cadeirio Meddwl Ymlaen – rhaglen ariannu gyfranogol ieuenctid gyntaf y Gronfa.

Callum Bruce-Phillips

Callum yw Cydlynydd Ymgysylltu a Gwirfoddoli Amgueddfa Cymru ac mae'n aelod o Fwrdd Cyfarwyddwyr Mess Up The Mess Theatre Company Ltd. Mae hefyd yn wneuthurwr ffilmiau ac yn hwylusydd llawrydd.

Mae gan Callum brofiad o gynrychioli lleisiau pobl ifanc yn ei rolau ar Fwrdd Cynghori Ieuenctid y Gronfa Gwaddol Ieuenctid, fel gweithiwr cymorth ieuenctid yng ngrwpiau ieuenctid YMCA Abertawe, ac wrth hwyluso gweithdy ymgynghori gyda phobl ifanc Grŵp Ieuenctid LHDTC+ GoodVibes.

Mae'n ymuno â Phwyllgor Cymru fel rhan o'n rhaglen Llais Ieuenctid, ymrwymiad i sicrhau bod lleisiau pobl ifanc yn cael eu cynnwys yn ein holl waith.

Dr Gwenllian Lansdown Davies

Gwenllian yw Prif Weithredwr Mudiad Meithrin, sefydliad gwirfoddol a phrif ddarparwr a galluogwr gofal ac addysg blynyddoedd cynnar cyfrwng Cymraeg yn y sector gwirfoddol, gyda dros 1000 o leoliadau ledled Cymru. Mae Gwenllian yn Ymddiriedolwr gyda Llyfrgell Genedlaethol Cymru ac mae’n gwirfoddoli yn ei Chylch Meithrin lleol ar y pwyllgor.

Yn hanu o Fangor yn wreiddiol, erbyn hyn mae hi wedi ymgartrefu gyda’i gŵr a’i phedwar o blant yn Llanerfyl, Sir Drefaldwyn. Astudiodd Ffrangeg a Sbaeneg yn Rhydychen cyn cwblhau gradd MScEcon a Doethuriaeth mewn Athroniaeth Wleidyddol ym Mhrifysgol Caerdydd lle bu hefyd yn diwtor gwleidyddiaeth.

Ar ôl cael ei hethol i gynrychioli Ward Glanyrafon ar Gyngor Sir Caerdydd yn 2004, cafodd ei phenodi’n Brif Weithredwr Plaid Cymru yn 2007. Gweithiodd hefyd fel Swyddog Cyhoeddiadau ar gyfer y Coleg Cymraeg Cenedlaethol ym Mhrifysgol Aberystwyth, lle’r oedd hi hefyd yn gyfrifol am ei gyfnodolyn ymchwil, ‘Gwerddon’.

Fadhili Maghiya

Fadhili yw Cyfarwyddwr Panel Cynghori Sub-Sahara, rhwydwaith o gymunedau Affricanaidd yng Nghymru sy’n gweithio mewn datblygiad rhyngwladol ledled Cymru. Mae Fadhili’n rheoli tîm sy’n gweithio ar brosiectau lleol a rhyngwladol (yn bennaf yn yr Affrica Sub-Saharan).

Mae hefyd yn Sylfaenydd ac yn Gyfarwyddwr Watch-Africa Cymru: Gŵyl Ffilm Affricanaidd Cymru. Wedi iddo ddechrau’r ŵyl yn 2013, mae wedi tyfu i ddod yn un o brif wyliau Cymru sy’n canolbwyntio ar sinema Affricanaidd. Ynghyd â rhedeg y prosiectau hyn, mae Fadhili yn Gymrawd Celf ar gyfer Cyngor Celfyddydau Cymru a Chymrawd RSA. Yn rhedwr brwd, pêl-droediwr ac yn mwynhau dadl iach.

Mutale Merrill OBE

Mae gan Mutale Merrill dros 35 mlynedd o brofiad yn y sector gwirfoddol. Ym 1995, fe sylfaenodd BAWSO a dod yn Brif Weithredwr y sefydliad sy’n ymrwymedig i ddarparu gwasanaethau arbenigol i ddioddefwyr cam-drin, trais a cham-fanteisio yng Nghymru ac eirioli ar eu rhan.

Trwy gydol ei gyrfa, mae Mutale wedi bod mewn nifer o swyddi cyfarwyddiadol ac ar nifer o fyrddau, gan gynnwys fel Cyfarwyddwr Anweithredol Bwrdd Llywodraeth Cymru, a sylfaenydd a chyd-gadeirydd y Sub-Sahara Advisory Panel (SSAP), a sylfaenydd Women Connect First.

Dr Victoria Winckler

Mae Dr Victoria Winckler wedi bod yn Gyfarwyddwr Sefydliad Bevan ers 2002. Dros y 40 mlynedd diwethaf mae hi wedi gweithio ar lefel uwch yn y trydydd sector, llywodraeth leol ac addysg uwch, sydd wedi rhoi dealltwriaeth ddwys iddi hi o gyd-destun gwleidyddol, cymdeithasol a diwylliannol Cymru.

Mae Victoria wedi ymrwymo'n gadarn i'r sector gwirfoddol a chymunedol, ar ôl gweithio ynddo am dros 20 mlynedd ac mae hi wedi gwasanaethu ar lawer o fyrddau elusennol a di-elw. Mae hi'n siarad yn rheolaidd mewn cynadleddau a seminarau, yn aml yn rhoi tystiolaeth lafar i Bwyllgorau'r Senedd, yn cyflwyno gweminarau a hyfforddiant, ac yn cyfrannu at radio a theledu.

Kate Young

Kate Young yw Cyfarwyddwr y Fforwm Cymru Gyfan i Rieni a Gofalwyr, sef y rhwydwaith cenedlaethol ar gyfer gofalwyr teuluol pobl ag anableddau dysgu, sy’n ymgysylltu â dros 4,000 o deuluoedd ledled Cymru.

Kate yw Is-gadeirydd Cynghrair Cynhalwyr Cymru a chynrychiolydd Iechyd a Gofal Cymdeithasol ar gyfer y Trydydd Sector yng Nghymru ar y Cyngor Partneriaeth. Mae’n rhan o sawl Grŵp Cynghori’r Gweinidog a fforymau polisi sy’n trafod pynciau fel taliadau uniongyrchol, Byrddau Partneriaeth Rhanbarthol, Eiriolaeth, Arolygu Gwasanaethau ac yn fwyaf diweddar, Bwrdd Rhanddeiliaid Brechlyn Covid i Gymru. Bu Kate hefyd yn Gadeirydd Pobl yn Gyntaf y Fro am ddeng mlynedd ac yn Ymddiriedolwr Cymru ar gyfer Cronfa’r Teulu y DU am bum mlynedd.

Mae gan Kate ddealltwriaeth gadarn o’r weinyddiaeth ddatganoledig yng Nghymru a’r cyfleoedd a heriau diwylliannol, cymdeithasol ac economaidd y mae’n ei chynnig i gymunedau. Mae ganddi ymrwymiad cryf i’r syniad bod cymunedau wrth wraidd newid, gan gredu bod ein natur unigryw ac amrywiol fel gwlad, pan fyddwn yn dod ynghyd, yn rym gwirioneddol dros newid, arloesi a chynhwysiant.

Mae’n eiriolwr angerddol dros hawliau a dewis personol, gyda diddordeb arbennig mewn anabledd, gofalwyr a chydraddoldeb. Fel gofalwr i’w brawd sy’n byw ag anableddau dysgu difrifol ac awtistiaeth, mae ganddi ddealltwriaeth bersonol a phrofiad bywyd o fodel cymdeithasol anabledd a’r problemau anghydraddoldeb o fewn cymdeithas yng Nghymru.