Cryfhau cymunedau: strategaethau ar gyfer cefnogi lleoedd sydd wedi colli allan ar ariannu

  1. Mewnwelediad
  2. Cryfhau cymunedau: strategaethau ar gyfer cefnogi lleoedd sydd wedi colli allan ar ariannu

Mae’r cwestiwn o sut i ddosbarthu arian i gymunedau yn deg, ac mewn ffyrdd sy’n creu newid parhaol, cadarnhaol, yn anodd i unrhyw gyllidwr neu benderfynwr. Mae ein cyllid yn cyrraedd cymunedau drwy elusennau, grwpiau cymunedol a mentrau cymdeithasol. Ond mewn nifer o achosion, nid oes gan y cymunedau sydd â’r angen mwyaf am gyllid y seilwaith cymdeithasol, sy'n golygu eu bod mewn perygl o golli cyfleoedd am grantiau a chymorth. Dros amser, heb yr adnoddau i ddod â chyllid i mewn ac adeiladu cyfalaf cymdeithasol, gallant wynebu amddifadedd a dirywiad anghymesur.

Nid yw prosiectau adfywio untro a buddsoddiadau o’r brig i lawr yn aml yn effeithiol wrth fynd i’r afael â’r mater hwn. Mae angen mwy nag arian ar gymunedau; mae angen cymorth arnynt i feithrin cysylltiadau a chyfleoedd, gweithio i gryfhau gallu a sgiliau lleol, a ffyrdd i wneud gwaith traws-gymunedol sydd â gwreiddiau dwfn. Dros amser, gall hyn helpu mynd i'r afael ag achosion sylfaenol tan-ariannu hirdymor.

Mae’r adroddiad hwn yn rhannu 10 dull yr ydym wedi’u defnyddio i ddarparu’r datrysiadau hyn mewn gwahanol lefydd ar draws y DU, y mae llawer ohonynt wedi’u dynodi’n flaenoriaeth gyntaf ym mynegai Cronfa Ffyniant Bro’r Llywodraeth. Bwriedir ei ddarllen ar y cyd â’n hadroddiad 2018 – Rhoi cynhwysion da yn y gymysgedd.

Mae'r astudiaethau achos isod yn dangos amrywiaeth o wahanol ddulliau o adeiladu seilwaith cymdeithasol trwy gynyddu gallu a chapasiti elusennau a rhwydweithiau lleol, grymuso cymunedau i adnabod a mynd i'r afael â'u blaenoriaethau, a helpu pobl i gael mynediad at gyfleoedd ariannu.

Ni fwriedir i’r adroddiad fod yn ganllaw manwl gywir ar sut i ddatrys mater cymhleth, amlochrog, ac ni allwn ddweud yn sicr bod y lleoliadau dan sylw wedi gweld gwelliannau hirdymor neu barhaol. Fodd bynnag, mae rhai o’r cymunedau a drafodir gennym wedi gweld lefelau uwch o fuddsoddiad, mae rhai wedi gweld trigolion yn cael ffyrdd i fynd i’r afael yn uniongyrchol â’u blaenoriaethau, ac mae rhai wedi arfogi pobl i ddefnyddio eu creadigrwydd i ddiwallu heriau hirdymor.

Gobeithiwn y bydd yr astudiaethau achos yn cynnig pecyn cymorth o ddulliau posibl ar gyfer cyllidwyr, awdurdodau lleol ac asiantaethau statudol sydd am weithio gyda ffocws mwy lleol, gan sicrhau bod y cyllid, cymorth a chyfleoedd sydd ar gael yn deg i bawb.

Dyddiad cyhoeddi
Mawrth 2023

Astudiaethau achos

  • Torbay: Cryfhau gallu, hyder a chydweithio lleol drwy waith meithrin capasiti wedi’i dargedu, cynnig grantiau cyfranogol, a meithrin partneriaethau rhwng sefydliadau lleol a chenedlaethol.
  • Dudley: Meithrin perthnasoedd cymunedol trwy weithgareddau, cyfleoedd gwirfoddoli a gwasanaethau cymorth wedi'u targedu, er mwyn meithrin ymddiriedaeth yn raddol mewn cymuned sy'n wyliadwrus o gefnogaeth allanol.
  • Gosport: Sefydlu partneriaethau rhwng grwpiau lleol llai a grwpiau rhanbarthol mwy i helpu sicrhau nad yw tref lai yn colli cyfleoedd am gyllid neu gefnogaeth i’w chymydog mwy.
  • Powys: Defnyddio perchnogaeth tir cymunedol fel ysgogiad ar gyfer buddsoddiad parhaus, trwy roi cyfle i bobl leol gymryd rheolaeth o’u mannau awyr agored a’u datblygu ar gyfer hamdden a thwristiaeth.
  • Ymddiriedolaeth Cyfran Deg: Buddsoddiad hirdymor i fynd i’r afael â thros 80 o fannau oer o ran ariannu ledled y DU, gan adeiladu gallu cymunedau lleol i’r pwynt lle mae seilwaith digonol yn bodoli i ddechrau dod â chyllid allanol i mewn.
  • Sir Clackmannan: Cynnal asedau cymunedol drwy gyllid amrywiol a chymorth datblygu wedi’i dargedu, gan helpu’r asedau i ddod yn hunangynhaliol a pheidio â dibynnu ar grantiau neu gyllid awdurdod lleol.
  • Northumberland: Arian a phŵer i gymunedau, gan roi’r rhyddid i bobl leol ddyrannu cyllid fel sy’n briodol, ei ddefnyddio i fynd i’r afael â blaenoriaethau lleol a thargedu buddsoddiadau bach sy’n trosoli cyllid allanol.
  • Barking and Dagenham: Grymuso pobl leol i ddylunio a chyflwyno gweithgareddau cymunedol sy'n canolbwyntio ar gyfranogiad cymunedol, heb fod angen ymgeisio am gyllid na sefydlu endidau ffurfiol.
  • Gorllewin Armagh: Ymgysylltu â thrigolion a datgloi buddsoddiad drwy gorff cydgysylltu lleol, gan ganiatáu cyllid i gyrraedd ystadau tai a allai fel arall gael eu hepgor o fynediad i grantiau a rhaglenni.
  • Southend-on-Sea: Buddsoddiad parhaus yn y blynyddoedd cynnar, gan ddod ag awdurdodau lleol, gwasanaethau statudol, elusennau, grwpiau cymunedol a darparwyr addysg ynghyd i weithio mewn ffordd strategol gysylltiedig.

Cryfhau cymunedau: strategaethau i gefnogi llefydd sydd heb dderbyn cyllid (PDF 4 MB)

↑ Yn ôl i'r frig