Mae angen eich pleidlais ar grwpiau cymunedol i ennill cyfran o dros £4 miliwn o gyllid y loteri genedlaethol

Bydd cyfle gan 95 o grwpiau cymunedol ledled y DU i ennill cyfran o £4 miliwn o gyllid y Loteri Genedlaethol ym Mhrosiectau’r Bobl eleni
Mae’r bleidlais yn agor am 9am ar Ddydd Llun 15 Mai ar www.thepeoplesprojects.org.uk
Bydd y prosiectau’n ymddangos ar ITV, UTV neu yn y Sunday Mail lle y gallwch chi weld eu gwaith anhygoel
Gallai eich pleidlais wneud gwahaniaeth – peidiwch â cholli’r cyfle i leisio eich barn.

Mae 95 o grwpiau cymunedol gweithgar ledled y DU yn gofyn i bobl eu helpu i ennill cyfran o dros £4 miliwn o gyllid Loteri Genedlaethol trwy bleidleisio drostynt ym Mhrosiectau’r Bobl eleni.

Yn dilyn egwyl tair blynedd, mae Cronfa Gymunedol y Loteri Genedlaethol, ITV, UTV a’r Sunday Mail (yn Yr Alban) yn cydweithio i roi cyfle i’r cyhoedd benderfynu sut y dylid defnyddio cyllid y Loteri Genedlaethol at achos da yn eu hardal.

Bydd prosiectau ar y rhestr fer yn cael y cyfle i ddangos eu gwaith ar ITV, UTV neu’r Sunday Mail wrth iddyn nhw gystadlu mewn pleidlais gyhoeddus. Ewch i www.thepeoplesprojects.org.uk i weld pwy sydd â chyfle i ennill cyllid Loteri Genedlaethol.

Ym mhob rhanbarth, bydd y tri phrosiect gyda’r nifer uchaf o bleidleisiau cyhoeddus yn derbyn grantiau hyd at £70,000. Bydd y cyllid hwn yn helpu gwneud gwahaniaeth gwirioneddol ym mywydau pobl, yn enwedig yn ystod yr adeg anodd hon. Bydd y prosiectau sy’n dod yn ail yn derbyn hyd at £10,000 tuag at eu prosiect, gan ddod â chyfanswm y cyllid sydd ar gael i gymunedau ledled y DU i dros £4 miliwn.

Mae Prosiectau’r Bobl nid yn unig yn rhoi grantiau hanfodol i wraidd cymunedau’r DU, ond hefyd yn codi ymwybyddiaeth am waith anhygoel y 95 o grwpiau cymunedol ar y rhestr fer sy’n cystadlu am eich pleidlais. Ers iddo ddechrau yn 2005, mae Prosiectau’r Bobl wedi dyfarnu tua £45 miliwn i dros 1,000 o achosion da.

Dywedodd Blondel Cluff CBE, Cadeirydd Cronfa Gymunedol y Loteri Genedlaethol: “Fel cyllidwr mwyaf gweithgarwch cymunedol yn y DU, rydym ni’n falch i ddyfarnu cyllid i wraidd cymunedau, yn enwedig yn ystod yr adeg heriol hon. Diolch i chwaraewyr y Loteri Genedlaethol, mae Prosiectau’r Bobl yn fenter wych sy’n dangos ymdrechion anhygoel grwpiau gweithgar ac ysbrydoledig, gyda phob un ohonynt yn rhoi cefnogaeth drawsnewidiol i helpu eu cymuned i ffynnu. Anogwn y cyhoedd i bleidleisio a lleisio eu barn am sut y defnyddir cyllid hollbwysig yn eu hardal leol i wneud gwahaniaeth i fywydau pobl.”

Mae’r bleidlais yn agor am 9am ar Ddydd Llun 15 Mai ac yn cau am hanner dydd ar Ddydd Gwener 26 Mai. Dim ond unwaith fesul rhanbarth y mae pobl yn gallu pleidleisio a bydd angen cyfeiriad e-bost neu rif ffôn symudol arnoch i bleidleisio.* Ewch i www.thepeoplesprojects.org.uk i bleidleisio ac i ddarllen y telerau ac amodau.

Mae Cronfa Gymunedol y Loteri Genedlaethol, cyllidwr mwyaf gweithgarwch cymunedol yn y DU, yn dyfarnu arian a godir gan chwaraewyr y Loteri Genedlaethol, sy’n codi dros £30 miliwn yr wythnos ledled y DU at achosion da.

Eleni, dyfarnwyd dros hanner biliwn o bunnoedd (£579.8 miliwn) o gyllid trawsnewidiol i gymunedau ledled y DU, gan gefnogi dros 14,500 o brosiectau. Dros y tair blynedd diwethaf, mae ei gyllid wedi cyrraedd pob etholaeth a phob awdurdod lleol yn y DU.

I ddysgu rhagor, ewch i www.TNLCommunityFund.org.uk

Dyddiad cyhoeddi: 11 Mai, 2023
Rhanbarth: Deyrnas Unedig

Nodiadau i Olygyddion

Y Loteri Genedlaethol a Phrosiectau’r Bobl

*I bobl nad ydynt yn gallu pleidleisio gan ddefnyddio cyfeiriad e-bost neu rif ffôn symudol, cysylltwch â’ch prosiect dewisol yn uniongyrchol er mwyn derbyn cerdyn post pleidleisio rhagdaledig.

I gael rhagor o wybodaeth am bleidleisio, ffoniwch 0800 197 8610 yn rhad ac am ddim.

Codir mwy na £30 miliwn yr wythnos at achosion da ledled y DU gan chwaraewyr y Loteri Genedlaethol. Ers i’r Loteri Genedlaethol ddechrau ym 1994, mae £43 biliwn wedi cael ei godi at achosion da. Mae cyllid y Loteri Genedlaethol wedi cael ei ddefnyddio i gefnogi dros 635,000 o brosiectau – 255 o brosiectau fesul ardal cod post.
I gael rhagor o wybodaeth am Y Loteri Genedlaethol a’i gemau, ewch i:  www.national-lottery.co.uk
Mae’n rhaid i chwaraewyr y Loteri Genedlaethol fod yn 18 oed neu’n hŷn.
Mae Prosiectau’r Bobl yn bartneriaeth rhwng Cronfa Gymunedol y Loteri Genedlaethol, ITV, UTV a’r Sunday Mail, Yr Alban, sy’n rhoi’r cyfle i’r cyhoedd leisio eu barn am sut y mae cyllid y Loteri Genedlaethol yn cael ei wario yn eu cymuned.
Mae Prosiectau’r Bobl yn cefnogi sefydliadau sy’n gwella bywydau pobl a chymunedau ledled y DU.
Eleni, mae 57 o grantiau hyd at £70,000 ar gael ledled y DU a bydd hyd at 38 o sefydliadau sy’n dod yn ail yn derbyn grantiau hyd at £10,000.
I gael rhagor o wybodaeth am y grwpiau ar y rhestr fer a’r bleidlais, ewch i www.thepeoplesprojects.org.uk

Cronfa Gymunedol y Loteri Genedlaethol

Cronfa Gymunedol y Loteri Genedlaethol yw cyllidwr mwyaf gweithgarwch cymunedol yn y DU – gan gefnogi pobl a chymunedau i lwyddo a ffynnu.

Mae’n dyfarnu arian a godwyd gan chwaraewyr y Loteri Genedlaethol i gymunedau ledled Lloegr, Yr Alban, Cymru a Gogledd Iwerddon, ac yn gweithio’n agos â’r Llywodraeth i ddyfarnu grantiau a chyllid hanfodol gan raglenni a mentrau allweddol y Llywodraeth.

Diolch i gefnogaeth chwaraewyr y Loteri Genedlaethol, mae’r grantiau ar gael i bawb. Mae’n fraint gan Gronfa Gymunedol y Loteri Genedlaethol allu gweithio â’r grwpiau lleol lleiaf i elusennau’r DU cyfan, gan alluogi pobl a chymunedau i ddod â’u hamcanion yn fyw.

Codir mwy na £30 miliwn yr wythnos at achosion da ledled y DU gan chwaraewyr y Loteri Genedlaethol. Ers i’r Loteri Genedlaethol ddechrau ym 1994, mae £43 biliwn wedi cael ei godi at achosion da. Mae cyllid y Loteri Genedlaethol wedi cael ei ddefnyddio i gefnogi dros 635,000 o brosiectau – 255 o brosiectau fesul ardal cod post.

Gwefan │Twitter │Facebook │Instagram