Pwy all ymgeisio
Rhaid i chi weithio mewn partneriaeth
Byddwn ond yn ariannu prosiectau lle mae partneriaeth o sefydliadau yn cydweithio i gynllunio a chyflawni prosiect.
Gyda'i gilydd, bydd gan eich partneriaeth yr arbenigedd a'r profiad cywir i baratoi a chefnogi pobl ifanc ar gyfer gyrfaoedd gwyrdd. Mae hyn yn cynnwys eu helpu i ddatblygu hyder a sgiliau emosiynol, ennill profiad gwaith a lleoliadau gwaith.
Gall sefydliadau perthnasol gynnwys y rheiny sydd:
- dan arweiniad defnyddwyr neu’n arbenigo mewn cefnogi pobl ifanc ag anableddau neu bobl ifanc o gymunedau ethnig leiafrifol
- yn arbenigwyr mewn lleoliadau gwaith cyflogaeth
- yn arbenigwyr mewn datblygu sgiliau a hyfforddiant. Gallai hyn gynnwys cymwysterau ffurfiol a chymorth i ddatblygu eu hyder a'u lles emosiynol
- yn gyflogwyr sy'n cynnig swyddi gwyrdd
- â chysylltiad da â'r gymuned gyda gwasanaethau a chyflogwyr eraill
- yn gweithio yn yr economi werdd ac sydd â gwybodaeth arbenigol
- yn gallu cynnal ymchwil a gwerthuso eich prosiect
- â phrofiad o farchnata, cyfathrebu, llunio polisïau a dylanwadu
- yn darparu gwasanaethau arbenigol a fyddai'n ategu neu'n cefnogi eich prosiect fel gwasanaethau iechyd meddwl, tai a phrawf.
Mae croeso i sefydliadau partner o bob sector a gallant fod yn sefydliadau sy'n gweithio'n lleol, yn rhanbarthol neu ledled Cymru.
Rhaid i'r sefydliad arweiniol, sy'n cyflwyno'r cais ar ran y bartneriaeth, fod wedi’i leoli yn y DU ac yn un o’r canlynol:
- elusen gofrestredig
- sefydliad gwirfoddol neu gymunedol
- sefydliad elusennol corfforedig (CIO)
- cymdeithas gydweithredol (os oes ganddi gymal nid-er-elw)
- cwmni cyfyngedig trwy warant (os oes ganddo gymal di-elw)
- cwmni buddiannau cymunedol (CIC)
- cymdeithas budd cymunedol.
Os penderfynwn ariannu eich prosiect, bydd y sefydliad arweiniol yn sicrhau bod y prosiect a'i bartneriaid yn bodloni ein telerau ac amodau grant. Bydd y sefydliad arweiniol yn rhoi diweddariadau cynnydd i ni, yn cysylltu â ni ynghylch unrhyw faterion sy'n ymwneud â'r prosiect ac yn derbyn y taliad ar ran y bartneriaeth.
Rhaid i chi ddefnyddio cytundeb partneriaeth
Gofynnwn am gytundebau partneriaeth gan y rhai a fydd yn helpu rheoli'r prosiect neu ddefnyddio ein grant i gyflawni'r prosiect.
Gallwch ddefnyddio ein templed cytundeb partneriaeth (PDF, 264 KB).
Mae'n rhaid i chi hefyd ddweud wrthym am sefydliadau eraill a allai fod ynghlwm mewn ffyrdd eraill megis sefydliadau y gallwch gyfeirio atynt neu dderbyn atgyfeiriadau ganddynt.
Mae angen o leiaf 3 aelod bwrdd neu bwyllgor arnoch sy'n 18 oed neu'n hŷn ac nad ydynt yn perthyn
Gall perthyn olygu:
- yn perthyn trwy briodas
- mewn partneriaeth sifil â’i gilydd
- mewn perthynas hirdymor â'i gilydd
- yn perthyn trwy bartner hirdymor
- yn cyd-fyw â’i gilydd yn yr un cyfeiriad
- yn perthyn trwy waed.
Rhaid i bob cwmni sy'n ymgeisio fod ag o leiaf dri chyfarwyddwr nad ydynt yn perthyn yn unrhyw un o'r ffyrdd hyn. Mae hyn yn berthnasol i gwmnïau sydd hefyd wedi'u cofrestru fel elusennau.
Pwy na all ymgeisio
Ni allwn dderbyn ceisiadau pan fo’r prif ymgeisydd yn:
- unigolyn neu’n unig fasnachwr
- grŵp sy'n gwneud elw
- gwneud cais ar ran sefydliad arall
- sefydliad nad yw wedi'i sefydlu yn y DU.