"Peidiwch â bod ofn gwneud cais" - awgrymiadau gan Little Potting Club ynglŷn â gwneud cais am grant

Allwch chi ddweud wrthym am eich prosiect? 

Mae'r Little Potting Club yn darparu gweithgareddau garddio i blant a'u teuluoedd. Ond dros y blynyddoedd mae wedi tyfu i fod yn llawer mwy. 
Rydym yn tyfu ffrwythau a llysiau yn ein gardd gymunedol. Rydym hefyd yn cynnig:

• cadwraeth natur
• gweithgareddau gwyddoniaeth
• crefftau natur

Rydym yn cefnogi iechyd corfforol a meddyliol teuluoedd ac yn eu hannog i fynd allan ym myd natur. Mae'r gweithgareddau yn rhad ac am ddim i bawb gymryd rhan. 

Beth oedd yr her fwyaf gyda'ch cais?

Ei gychwyn. Doeddwn i ddim yn siŵr a fyddem yn ddigon teilwng neu'n ddigon pwysig i gael grant. 

Fe wnaethom fynychu cyflwyniad a gynhaliwyd gan Swyddog Ariannu lleol o Gronfa Gymunedol y Loteri Genedlaethol. Fe wnaeth hyn ein sicrhau ein bod yn bodloni'r meini prawf ac yn gallu gwneud cais am grant.

Helpodd y cyflwyniad i ni wybod beth oedd angen i ni ei wneud a rhoddodd bwynt cyswllt i ni. Os gallwch fynychu cyflwyniad ariannu lleol byddwn yn argymell mynd.

Sut wnaethoch chi fynd â'ch prosiect o syniad i gais ysgrifenedig?

Roedd y prosiect eisoes wedi'i sefydlu'n dda ac wedi'i ymgorffori yn y gymuned. Yn syml, ysgrifennais yr hyn yr oeddem yn angerddol amdano a'r gwaith da rydyn ni'n ei gyflawni yn y clwb. Gadewais i'r clwb ddisgleirio drosto'i hun. 

Roedd hefyd yn helpu i gael aelod o staff i gysylltu â nhw. Mae gallu e-bostio person mor werthfawr.

Pa gyngor fyddech chi'n ei roi i sefydliadau bach sy'n gwneud cais am grant? 

Fy nghyngor i sefydliadau bach yw:

• cael nod clir ar gyfer eich prosiect
• gofyn am help os oes ei angen arnoch
• peidio â bod ofn gwneud cais

Gall ymgeisio deimlo’n frawychus ond ewch amdani.

Pa effaith gadarnhaol mae eich prosiect wedi'i chael hyd yn hyn?

Agorodd y prosiect gymaint o ddrysau, mae wedi:

• rhoi cyfle i deuluoedd gymryd rhan am ddim
• darparu amgylchedd dysgu hamddenol
• helpu’r gymuned ehangach i fwynhau'r blodau rydyn ni'n eu plannu yn y parc a'r ardd gymunedol, hyd yn oed os nad ydyn nhw'n mynychu'r clwb

Hoffwn ddiolch yn fawr i'r Loteri Genedlaethol am roi cyfleoedd ariannu fel hyn i grwpiau bach.