Ein Hadroddiad Bwlch Cyflog Rhywiol 2024
Mae’n ofynnol i bob sefydliad gyda 250 o weithwyr neu fwy gyhoeddi data ar eu bwlch cyflog rhwng y rhywiau (y gwahaniaeth mewn tâl fesul awr rhwng gweithwyr gwrywaidd a benywaidd) bob blwyddyn.
Mae’r ffigurau a nodir isod wedi’u cyfrifo gan ddefnyddio’r methodolegau safonol a ddefnyddir yn Neddf Cydraddoldeb 2010 (Gwybodaeth am Fwlch Cyflog Rhywiol) Rheoliadau 2017. Nodwch fod y bwlch cyflog rhwng y rhywiau yn wahanol i gyflog cyfartal, sy’n cyfeirio at dalu dynion a menywod yr un fath am yr un gwaith neu waith cyfatebol ac sy’n ofyniad cyfreithiol.
Ar 31 Mawrth 2024, roedd 843 o weithwyr gyda’r Gronfa Gymunedol y Loteri Genedlaethol. Ein bwlch cyflog canolrifol yw 2.2% a’n bwlch cyflog cyfartalog yw 6.4%.
Mae ein bwlch cyflog canolrifol wedi cynyddu ychydig o 1.9%, tra bod y bwlch cyflog cyfartalog hefyd wedi cynyddu o 4.7% yn 2023. Mae’r cynnydd yn y bwlch cyflog yn adlewyrchu’r ffaith fod cyfran uwch o fenywod wedi ymuno â ni ar lefelau mwy iau yn ystod y flwyddyn o gymharu â dynion.
O ran meincnodi cyffredinol, rydym o dan y bwlch cyflog canolrifol rhwng y rhywiau yn y DU ar gyfer 2024 sef 13.1% ar gyfer pob gweithiwr a 7.0% ar gyfer gweithwyr llawn amser. Nid oes lle i hunanfodlonrwydd, ac rydym yn parhau i ymrwymo i leihau’r bwlch cyflog rhwng y rhywiau yn ein sefydliad.
Bwlch cyflog bonws rhwng y rhywiau
Yn 2023, derbyniodd 723 o weithwyr fonws – 503 o fenywod a 220 o ddynion. Mae hyn yn cynrychioli 93% o’r menywod a 94% o’r dynion i gyd yn y Gronfa.
Y bwlch bonws cyfartalog rhwng y rhywiau – sef y gwahaniaeth rhwng y tâl bonws cyfartalog i fenywod perthnasol (wedi’u cymryd fel un grŵp) a’r tâl bonws cyfartalog i ddynion perthnasol (hefyd fel un grŵp) – yw 24.4%. Mae’r bwlch bonws canolrifol rhwng y rhywiau yn parhau ar 0%.
Chwartelau cyflog
Mae’r tabl canlynol yn dangos y dosbarthiad rhwng y rhywiau ar draws Cronfa Gymunedol y Loteri Genedlaethol. Mae’r chwartel cyntaf yn cynnwys gweithwyr ar y cyflogau uchaf a’r pedwerydd chwartel yn cynnwys gweithwyr ar y cyflogau isaf.
| Chwartel cyflog | Benyw (%) | Dyn (%) |
|---|---|---|
| Chwartel uchaf (cyflog uchaf) | 64% | 36% |
| Chwartel canol uwch | 72% | 28% |
| Chwartel canol is | 71% | 29% |
| Chwartel isaf (cyflog isaf) | 75% | 25% |
Ein hymrwymiad sefydliadol
Mae ein hymrwymiad sefydliadol i degwch cyflog i bawb wedi’i seilio yn ein Datganiad o Fwriad Cydraddoldeb, Amrywiaeth a Chynhwysiant (EDI), a fydd yn cael ei gyhoeddi yn ddiweddarach eleni. Rydym yn parhau i ganolbwyntio ar anghydraddoldebau cyflog ac yn gwrando’n weithredol ar brofiadau a sylwadau staff ac yn gweithredu arnynt.
Mae ein hymrwymiadau yn cynnwys:
- gweithio’n agos gyda’n Rhwydwaith Menywod dan arweiniad gweithwyr, i wella ein polisïau a’n canllawiau pobl – gan gynnwys Polisi Mamolaeth diwygiedig a chefnogaeth i’r menopos – a chodi ymwybyddiaeth o’r materion y mae menywod yn eu hwynebu yn y gwaith
- adolygu’n barhaus ein hanghenion a’n dull recriwtio, fel bod Cronfa Gymunedol y Loteri Genedlaethol yn fwy adlewyrchol o’r cymunedau rydym yn eu gwasanaethu
- mynd i’r afael â’r rhwystrau i gynnydd gyrfa i fenywod, yn enwedig y rhai sy’n profi ymylu oherwydd agweddau eraill megis hil, anabledd, cyfeiriadedd rhywiol, hunaniaeth rhywedd a chefndir economaidd-gymdeithasol
- ymchwilio i’r gymhareb rhwng menywod a dynion ar bob lefel swydd a mynd i’r afael â hi
- hyrwyddo ein polisïau gweithio hyblyg, llesiant a chynlluniau absenoldeb gyda chydweithwyr, yn ogystal â mynediad teg a chyfartal i hyfforddiant a chyfleoedd datblygu proffesiynol
- deall y materion cymdeithasol ac economaidd ehangach sy’n effeithio ar fenywod, megis yr argyfwng costau byw, patrymau gwaith a chydbwyso cyfrifoldebau gofalu
Adroddiadau blaenorol
Gallwch ddod o hyd i adroddiadau blaenorol ar y Bwlch Cyflog Rhywiol ar ein harchif ar archif we’r Archifau Cenedlaethol: