Meddwl Ymlaen | Cronfa Gymunedol y Loteri Genedlaethol

Vic Studios

Bydd Meddwl Ymlaen ar agor ar gyfer ceisiadau ddiwedd Gwanwyn 2021. Yn y cyfamser, rydym am rannu gyda chi rywfaint o wybodaeth am ein hymchwil, ein dull gweithredu, a'r hyn y mae pobl ifanc am ei weld o brosiectau da fel y gallwch ddechrau meddwl am sut y gallech weithio gyda phobl ifanc ar brosiect

Byddwch y cyntaf i gael gwybod pryd mae Meddwl Ymlaen yn lansio drwy gofrestru ar gyfer ein cylchlythyr neu ein dilyn ar gyfryngau cymdeithasol ar Facebook neu Twitter.

Pryd: Yn lansio yn ddiweddarach yn y gwanwyn, gyda digwyddiadau gwybodaeth ar Fehefin yr 8fed, 14eg a’r 23ain ac ar Orffennaf yr 2il a’r 8fed.

Ardal: Cymru
Yn addas ar gyfer: Mae’n rhaid i bartneriaethau gynnwys o leiaf un sefydliad o’r sector gwirfoddol neu gymunedol ac o leiaf un sefydliad o’r sector gyhoeddus.

Ein hymchwil

Ym mis Mawrth 2020, recriwtiwyd 10 o bobl ifanc anhygoel o bob rhan o Gymru i weithio gyda ni, i gynllunio a chynnal ymchwil i'r materion sy'n bwysig i bobl ifanc yng Nghymru, gyda chymorth ProMo Cymru a'r Weinyddiaeth Bywyd.

Fel rhan o'u hymchwil, mae tîm Pobl Ifanc yn Arwain Cymru wedi bod yn siarad gyda phobl ifanc ledled Cymru ac yn gofyn iddynt beth sydd bwysicaf iddynt a beth sy'n eu cadw'n effro yn y nos.

Rydym hefyd wedi bod yn gwrando'n astud ar sefydliadau'r sector cyhoeddus a'r trydydd sector sy'n cefnogi pobl ifanc i gael gwybod beth maen nhw'n ei glywed gan bobl ifanc. Ynghyd â'r panel, ProMo Cymru a'r Weinyddiaeth Fywyd, gwnaethom ddilyn ein hymchwil gyda chyfres o sesiynau cyd-ddylunio i drafod yr hyn yr oeddem i gyd wedi'i ddysgu.

Yn seiliedig ar yr hyn a glywsom gan bobl ifanc, cytunwyd bydd £10 miliwn o arian y Loteri Genedlaethol yn cael ei ddefnyddio i ariannu prosiectau sydd â'r nod o helpu iechyd meddwl a gwydnwch pobl ifanc, ac y dylai pobl ifanc arwain y ffordd o ran dychmygu a chreu dyfodol mwy gwydn a meddyliol iach wrth i gymdeithas ailadeiladu ac adfer o bandemig COVID-19.

Tynnodd ein panel o bobl ifanc sylw at rai meysydd allweddol o'u hymchwil i'n helpu i ddeall pa fath o wahaniaeth y gallai'r grantiau hyn ei wneud. Roedd y rhain yn cynnwys:

Creu mwy o opsiynau cymorth a sicrhau bod pobl ifanc yn gallu cael y cymorth cywir ar yr adeg iawn, ble bynnag y maent yn troi am help.
Symud i ffwrdd o weld 'cymorth' fel rhywbeth na ellir ond ei ddarparu gan wasanaethau ffurfiol – mae pobl ifanc am gael amrywiaeth o opsiynau ac i weithgarwch nad yw'n cael ei ystyried yn draddodiadol yn 'gymorth iechyd meddwl' fod mewn sefyllfa well i hybu eu hiechyd meddwl a'u gwydnwch.
Mae angen cyfeirio pobl ifanc yn well er mwyn sicrhau eu bod yn gwybod sut i gael gafael ar y cymorth a'r gwasanaethau sy'n bodoli eisoes.
Mae'n bwysig iawn bod profiad llygad y ffynnon amrywiol pobl ifanc yn cael ei adlewyrchu wrth gynllunio a chyflawni prosiectau, rhaglenni a gwasanaethau.
Mae pobl ifanc yn gweld gwerth ac effeithiolrwydd cymorth gan gymheiriaid a dulliau gweithredu sy'n seiliedig ar weithgareddau.

Yn fwy na dim, nod y rhaglen hon yw grymuso pobl ifanc i wneud gwahaniaeth i iechyd meddwl a gwydnwch y genhedlaeth bresennol a chenedlaethau'r dyfodol o bobl ifanc yng Nghymru.

Ein dull o weithio

Mae pobl ifanc wedi bod wrth galon datblygiad ein rhaglen Meddwl Ymlaen, ac mae’r dull cyd-lunio wedi bod yn rhan bwysig o sut mae Cronfa Gymunedol y Loteri Genedlaethol wedi gweithio gyda phobl ifanc ledled Cymru i greu’r rhaglen ariannu.

Mae’r dull cydlunio wedi golygu fod pobl ifanc yn bartneriaid cydradd gyda barn gydradd yn natblygiad y rhaglen, ac yn sut y bydd yr arian yn cael ei ddefnyddio i gefnogi pobl ifanc yng Nghymru.

Mae’n bwysig i ni fod pobl ifanc yn parhau i gael llais drwy gydol y rhaglen, felly bydd ein Panel Cynghori Pobl Ifanc yn Arwain Cymru yn parhau i fod yn rhan o benderfyniadau Cronfa Gymunedol y Loteri Genedlaethol ar ôl i’r rhaglen gael ei lansio.

Beth rydyn ni'n chwilio amdano

Byddwn yn darparu popeth y mae angen i chi ei wybod am wneud cais i Meddwl Ymlaen pan fydd yn lansio ddiwedd y Gwanwyn. Fodd bynnag, yn y cyfamser gofynnwyd i'n panel cynghori Pobl Ifanc yn Arwain Cymru ddweud wrthym beth sy'n bwysig iddynt wrth ystyried sut mae prosiect da yn edrych:

Fel tîm o bobl ifanc, rydym yn chwilio am bartneriaethau:

sy'n dangos eu bod yn deall pwysigrwydd cynnwys pobl ifanc.
rhoi cynnig ar syniadau neu ffyrdd newydd o weithio.
sydd â'r gallu i gyflawni'r hyn y maent yn dweud eu bod am ei wneud.
sy'n defnyddio ystod eang o ddulliau a thechnegau i rymuso pobl ifanc i helpu i gyd-lunio eu prosiect a pheidio â chymryd yr agwedd fod un dull yn addas i bawb.
sy'n chwilio am bartneriaid a chysylltiadau newydd yn hytrach na gweithio gyda'r un sefydliadau ag arfer.
sy'n deall sut i ddod â gwahanol grwpiau o bobl ifanc at ei gilydd, rhoi ymdeimlad o berthyn iddynt a gwneud iddynt deimlo'n rhan o gymuned gyda'i gilydd.

Rydym am weld:

ceisiadau sy'n agored am eu cryfderau a'u cyfyngiadau.
bod pobl ifanc wedi cymryd rhan wirioneddol o'r dechrau a'u bod wedi bod yn rhan o benderfyniadau allweddol, gan gynnwys rhoi'r cais at ei gilydd.
na fydd unrhyw bobl ifanc yn cael eu gadael allan o gynlluniau partneriaeth i'w cyrraedd, cynnwys a'u grymuso.
bod partneriaethau'n gwybod sut i wneud eu gweithgarwch yn gwbl agored i bob grŵp o bobl ifanc.
bod sefydliadau'n gwrando ar bobl ifanc ac yn addasu eu cynlluniau'n barhaus o ganlyniad.